Huzuni na majonzi zimetanda katika jimbo la Tamil Nadu nchini India baada ya watu 34 kuthibitishwa kufariki.
Kulingana na taarifa ya Waziri Mkuu wa Jimbo MK Stalin, waathiriwa walikufa muda mfupi baada ya kunywa pombe iliyotengenezwa kinyume cha sheria.
Stalin alisema zaidi ya watu 100 walikimbizwa hospitalini kwa matibabu baada ya kunywa pombe hiyo haramu.
"Uhalifu kama huo ambao unaharibu jamii utakandamizwa kwa mkono wa chuma," Stalin alisema Alhamisi, Juni 20 kama ilivyoripotiwa na Aljazeera.
Afisa wa wilaya MS Prasanth alisema idadi ya wagonjwa katika hali mbaya inaendelea kubadilika, na kupendekeza kwamba idadi ya vifo inaweza kuongezeka.
Serikali ya jimbo hilo ilithibitisha katika taarifa yake kuwa imewasimamisha kazi angalau maafisa 10, akiwemo mtoza ushuru na mkuu wa polisi.
Polisi walimkamata mtu mmoja kwa kuuza pombe haramu na kukamata lita 200 (7,039fl oz) za kinywaji hicho cha pombe kilichochanganywa na methanol, serikali ilisema.
Magari ya kubebea wagonjwa, madaktari na wataalamu kutoka maeneo ya karibu yalitumwa wilayani humo kushughulikia mgogoro huo.
Vifo vinavyotokana na pombe iliyotengenezwa kinyume cha sheria, maarufu kwa jina la hooch, ni jambo la kawaida nchini India, ambako maskini hawawezi kumudu bidhaa zilizoidhinishwa kutoka kwa maduka yanayosimamiwa na serikali.
Mnamo 2022, zaidi ya watu 30 walikufa katika jimbo la Bihar mashariki mwa India na angalau 28 walikufa katika jimbo la Gujarat magharibi baada ya kunywa pombe chafu iliyouzwa bila idhini.
Na mnamo 2020, angalau watu 120 walikufa baada ya kunywa pombe chafu katika jimbo la Punjab kaskazini mwa India.
