Muuguzi mmoja nchini Uingereza anakabiliwa na tuhuma za mauaji ya watoto saba na jaribio la kuwaua wengine 10 katika hospitali ya Countess of Chester.
Lucy Letby, 32, anakabiliwa na mashtaka 22 ambayo mwendeshaji wa mashtaka ameyataja kama ukatili wa mara kwa mara aliyokuwa akifanya katika kitengo cha watoto wachanga cha hospitali hiyo.
Mahakama ilielezewa kuwa mtoaji sumu alikuwa kazini katika hospitali hiyo ambapo visa vya watoto wenye afya wanaokufa vilikuwa vikiongezeka kwa kiasi kikubwa.
"Kabla ya Januari 2015, takwimu za vifo vya watoto wachanga katika kitengo cha watoto wachanga katika kituo cha Countess of Chester zililinganishwa na vitengo vingine kama hivyo."
"Hata hivyo, katika muda wa miezi 18 hivi iliyofuata, kulikuwa na ongezeko kubwa la idadi ya watoto waliokuwa wakifa,'' alisema Nick Johnson KC, anayeendesha mashtaka kama alivyonukuliwa na BBC.
Nick Johnson KC alisema kuongezeka kwa idadi hiyo iligunduliwa na washauri wa hospitali, ambao walizua wasiwasi kwamba watoto wachanga waliokuwa wakifa walidhoofika bila kutarajiwa.
Baada ya uchunguzi kufanywa na washauri, ilibainika kwamba vifo hivyo visivyoelezeka vilikuwa na vyanzo vya aina moja.
Johnson alieleza mahakama kwamba kutokana na madaktari kushindwa kutoa maelezo kuhusu vifo hivyo, polisi waliitwa na kufanya uchunguzi wa kina.
Uchunguzi wa polisi ulipendekeza kuwa katika kipindi cha kati ya mwaka wa 2015 na katikati ya 2016, mtu fulani katika kitengo cha watoto wachanga aliwatia sumu watoto wawili.
Inaripotikiwa kuwa Lucy Leby alikuwa zamu wakati watoto wote wawili walipopewa sumu na anashukiwa kuwa yeye ndiye aliyeweka sumu hiyo.
Johnson anasisitiza kuwa vifo hivyo havikuwa ajali na wala sio vya ya asili na matukio mengi yalitokea wakati wa zamu za usiku.
Hata hivyo, Letby amekanusha mashtaka hayo katika mahakama ya Crown ya Manchester.
