Biwi la simanzi limevaa kijiji cha Migingo, katika Kaunti Ndogo ya Kadibo, baada ya Naibu Mwalimu Mkuu wa Shule ya Upili ya Wasichana ya Migingo, Roseline Atieno Nyawada, kupatikana ameuawa nyumbani kwake.
Kwa mujibu wa taarifa iliyotolewa na Idara ya Upelelezi wa Makosa ya Jinai (DCI), mwili wa mwalimu huyo ulipatikana Jumapili, Agosti 21, Bafuni na mwanawe wa kiume ndiye mshukiwa mkuu.
DCI ilieleza kuwa mwili wa Roseline ulipatikana na kaka yake mshukiwa ambaye alikuwa amekwenda kumtembelea katika nyumba za wafanyakazi wa shule hiyo.
Juhudi za mwanawe mwalimu huyo kujaribu kuingia ndani ya nyumba hiyo zilishindikana kwani mlango ulikuwa umefungwa kwa ndani.
Kisha dakika chache baadaye, mshukiwa mwenye umri wa miaka 27, alifungua mlango naye kaka yake alikimbia ndani ya nyumba kumwangalia mama yake.
Hata hivyo, alipatana na mabaki ya mama yake yaliyochomwa bafuni.
"Ndugu huyo aliingia ndani ya nyumba mara moja akimtafuta mama yake sebuleni na chumbani bila mafanikio. Lakini alipokaribia bafuni, alipatana na mabaki ya mama yake yaliyochomwa."
Maafisa wa polisi kutoka Kituo cha Polisi cha Rabuor waliwasili haraka baada ya kujuzwa kuhusu tukio hilo.
Polisi hao walipata mafuta ya taa kwenye kikombe na pia wakaeleza kuwa kuta za bafuni zilikuwa na masizi wakishuku kuwa mwanawe Roseline, alimumwagia mafuta ya taa na kumteketeza moto.
"Pia kilichopatikana kwenye eneo la tukio kilikuwa kisu cha jikoni kando ya mwili wa mwanamke huyo na taa ya mafuta taa iliyokuwa na kifundo kilicho wazi. Vitu vyote vilivyopatikana vimehifadhiwa kama ushahidi,"
Maafisa wa upelelezi walithibitisha kuwa mwili wa marehemu ulipelekwa katika chumba cha kuhifadhi maiti cha hospitali ya kaunti hiyo ukisubiri kufanyiwa uchunguzi wa maiti.
Mwanawe Roseline pia alikamatwa na anazuiliwa katika seli ya polisi huku akisubiri kufikishwa mahakamani.
.jpeg)
