Manchester United imethibitisha kuwa Paul Pogba ataondoka katika klabu hiyo kama mchezaji huru mwishoni mwa mwezi huu.
Kiungo huyo wa kati wa Ufaransa alijiunga tena na Mashetani Wekundu kutoka Juventus kwa pauni milioni 89 (€105m) mwaka 2016 - miaka minne baada ya kuhama kutoka Old Trafford na kwenda Turn.
Pogba alitarajiwa kuwa njiani kuondoka United tena wakati mkataba wake utakapoisha na kuondoka kwake kuthibitishwa Jumatano.
Mchezaji huyo mwenye umri wa miaka 29 amecheza mechi 20 pekee katika klabu hiyo ya Ligi Kuu ya Uingereza katika msimu mbaya wa mwisho, ambao ulihitimisha kipindi chake cha pili akiwa na Mashetani Wekundu.
Pogba amekuwa akihusishwa na miamba kadhaa ya Ulaya, wakiwemo washindi wa Ligi ya Mabingwa Ulaya, Real Madrid na klabu yake ya zamani ya Juve.
Katika taarifa iliyotolewa kwenye tovuti yao, United ilisema: "Klabu inaweza kutangaza kwamba Paul Pogba ataondoka Manchester United mwishoni mwa Juni, baada ya kumalizika kwa mkataba wake.
“Kila mmoja katika klabu angependa kumpongeza Paul kwa mafanikio yake ya soka, na kumshukuru kwa mchango wake kwa Manchester United.
"Tunamtakia kila la kheri kwa hatua zinazofuata katika safari ya ajabu."
Pogba alishinda Kombe la EFL na Ligi ya Europa baada ya kurejea United miaka sita iliyopita, na mafanikio yote mawili yalikuja katika msimu wake wa kwanza katika klabu hiyo chini ya Jose Mourinho.
Anaondoka kwenye klabu hiyo akiwa amecheza mechi 157 za Premier League, akifunga mabao 29 na kutoa asisti 38.
